Puntuen zerrenda

Munduzale, kaxkarin eta burugabe izaten ahalegintzen zara koldarra zarelako. Zer da, izan ere, zeure buruari aurre egin nahi ez hori, koldarkeria baizik?

Ez duzu inoiz ere «egia agortu» nahi. —Gizalegez, batzuetan. Beste batzuetan —gehienetan— zeure burua ez larritzearren. Zenbaitetan besteak ez larritzeko. Eta beti, koldarkeriaz.

Horrela, sakontzeari diozun beldur horrekin, inoiz ez zara irizpide zuzeneko gizon izango.

Ez egiaren beldurrik izan, egiak heriotza badakarkizu ere.

Amore eman? —Borrokarako gogorik ez dutenen —patxadazale, maltzur, koldarren— lexikoan baizik aurkitzen ez den hitza da —amore eman behar da!—, aldez aurretik baitakite garaituak daudela.

Ez zaitez koldarra izan «ausartarena» eginez: ihes egin ezazu!

Nahigabeak lur jota uzten zaitu, uzkurturik hartzen duzulako. —Har ezazu ausarki, kristau espirituz: eta altxorra bailitzan ederretsiko duzu.

Zure nagikeria, zure utzikeria eta zure alferkeria, koldarkeria eta erosokeria dira —kontzientziak etengabe hala erakusten dizu—, baina «ez dira bide».

Aurrera! Zuk… badezakezu. —Ikusten al duzu Jaungoikoaren graziak Pedro loti, ukatzaile eta koldar harekin… edo Paulo jazarle, gorrotatzaile eta tematsu harekin egin zuena?

Guztiz ez nahi izatea da zure nahia, arriskutik urruntzea erabakitzen ez duzun arte. —Ez ezazu zeure burua engainatu nahi, ahula zarela niri esanaz. —Zu… koldarra zara, eta ez da berdin.

«Duc in altum». —Itsasoan barrena! —Koldar bihurtzen zaituen ezkortasun hori bazter ezazu. «Et laxate retia vestra in capturam» —eta bota itzazu sareak arrantzarako.

Ez al duzu ikusten Pedrok bezala esan dezakezula: «in nomine tuo, laxabo rete» —Jesus, zure izenean arimen bila joango naiz?

Esperientzia gogorra izan da: ez ahaztu ikasbidea. —Zure oraingo koldarkeria handiak —argi dago— zure eguneroko koldarkeria txikien besotik doaz.

«Ezin izan duzu» gauza handietan garaile irten, txikietan garaitu «nahi izan ez zenuelako».

Arimateako Josek eta Nikodemok ezkutuan bisitatzen dute Jesus garai arruntean eta baita garaipen orduan ere.

Baina bihoztunak dira Kristorenganako maitasuna agintarien aurrean ausarki —«audacter»— aitortzean, koldarkeri orduan. —Ikas ezazu.