Puntuen zerrenda

Lurpera itzazu penitentziaren bidez zure zabarkeria, irain eta bekatuak, zure apaltasunak egindako zulo sakonean. —Horrela lurperatzen ditu nekazariak fruitu ustelak, arba iharrak eta orbela sortu dituen arbolaren ondoan. —Eta, antzu, hobeto esana, kaltegarri zena, ugaritasun berri baten bultzagarri bihurtzen da.

Ikas ezazu erorialdietatik indarra ateratzen: heriotzatik, bizitza.

Begira nolako errai errukiorrak dituen Jaungoikoaren zuzentasunak! —Gizonen epaiketetan, bere errua aitortzen duena zigortu egiten baitute: eta Jaungoikoarenean, barkatu.

Bedeinkatua izan bedi Penitentziako Sakramentu santua!

«Induimini Dominum Jesum Christum» —Jesukristo Gure Jaunaz jantz zaitezte, esaten zien San Paulok Erromatarrei. —Penitentziako Sakramentuan jazten gara, zu eta ni, Jesukristoz eta haren merezimenduez.

Bai bihozbera Kristo bere Elizari Sakramentuak uztean! Premia bakoitzaren erremedio dira.

—Gurtu itzazu eta eskerronekoa izan zaitez Jaunarekin eta bere Elizarekin.

Aita: nola jasan dezakezu zabor hau? —esan zenidan—, aitortza damutu baten ondoren.

—Isildu nintzen pentsatuz, zure apaltasunak zeure burua hori dela sentitzera eramaten bazaitu —zaborra: zabor pila bat!— zure ezerezkeria guztiaz gauza handiren bat egin dezakegula oraindik.