Puntuen zerrenda

Ez zaitez kezkatu, edozer gauza gertatu arren, amore ematen ez baduzu. —Nahimenak bakarrik ireki baitezake bihotzaren atea, eta gauza nardagarri horiek bere barruan sartu.

Bazter itzazu bakea kentzen dizuten eskrupulo horiek. — Arimari bakea ebasten diona ez dator Jaungoikoagandik.

Jaungoikoa etortzen zaizunean, agur haien egia nabarituko duzu: bakea ematen dizuet…, bakea uzten dizuet…, bakea zuei…, eta hori, nahigabeen artean.

Oraindik ere eskrupulo horiek! —Hitz egin iezaiozu garbi eta xaloki zure Zuzendariari.

Obedi ezazu… eta ez gutxietsi Jaunaren Biohtz guztiz maitetsua.

Triste, lur jota. Ez nau harritzen: zure erorialdiak altxatako hauts hodeia da. Baina, aski da!: ez al zuen urrundu, agian, graziaren haizeak hodei hori?

Gero, zure tristura hori —baztertzen ez baduzu— zure harrokeriaren azala bihur liteke. —Ezin hobea eta hutsik gabea zinela uste zenuen, ala?

Horretan gehiago pentsatzea debekatzen dizut. —Aldiz, bedeinka ezazuJaungoikoa, zure arimari bizitza itzuli baitzion.

Ez pentsatu gehiago zure erorialdian. —Pentsamendu hori, zapaltzen eta estutzen zaituen harlauza izanez gain, erraz izan daiteke hurrengo tentaldien abagune. —Kristok barkatu zizun: gizon zaharraz ahatz zaitez.

Ez adorerik galdu. —Ikusi zaitut borrokan…: zure gaurko porrot hori erabateko garaipenerako saiaketa da.

Ongi jokatu duzu…, hain sakon erori bazara ere. —Ongi jokatu duzu, beheratu zinelako, zuzendu duzulako eta itxaropenez bete zarelako, eta itxaropenak Maitasunarengana erakarri zintuen berriro. —Ez zaitez gelditu aho zabalik; ongi jokatu duzu! —Lurretik jaiki zinen: «surge», ahots indartsua berriro entzun zen, «et ambula»: orain, lanera!

Lasai gera zaitez iritzi ortodoxoa azaldu bazenuen, entzuleak, maltzurkeriaz, gaizpide hartu arren. —Fariseu gaizpidea baita harena.

Jauna har ezazu. —Ez da errespetu falta. —Gaur bertan Jauna har ezazu hain zuzen ere, korapilo hartatik irten berria zaudelarik.

—Ahaztu al zaizu Jesusek esandakoa: ez dute medikuren beharrik osasuntsuek, eriek baizik?

Zuretzat gelditu zen. —Ongi prestaturik bazaude, Jauna hartu gabe gelditzea ez da begirunea. —Behar den prestaerarik gabe Jauna hartzea da, bakarrik, begirunerik eza.

Bihotzean su eta ur, hotz eta bero, grinatxoak eta Jaungoikoa dituzula esaten didazu…: kandela bat San Migeli piztua eta bestea deabruari.

Lasaitu zaitez: borroka jarraitu nahi duzun bitartean, ez daude bi kandela, bat bakarra baizik, Goiaingeruarena.