Puntuen zerrenda

Nahimena. —Adorea. —Eredua. —Egin behar dena, egin bedi… Zalantzarik gabe… Begiramendurik gabe…

Bestela, Cisneros ez litzateke Cisneros izango; ez Ahumadako Teresa, Santa Teresa…; ezta Loiolako Iñigo, San Ignazio…

Jaungoikoa eta ausardia! —«Regnare Christum volumus!».

Alden itzazu zugandik, gutxienez denbora galarazten dizuten alferrikako gogoeta horiek.

Aitzakiak. —Inoiz ez zaizkizu faltako zure eginbeharrak bertan behera uzteko. Zenbat eta zenbat zentzugabeko argudio!

Ez zaitez argudio horiek hausnartzen gelditu. Bazter itzazu eta bete zure eginbeharra.

Ezin duzula gehiago egin!? —Ez ote da… ezin duzula gutxiago egin?

Ongi erabil iezadazu denbora. —Pikondo madarikatuaz ez zaitez ahatz. Zerbait egiten zuen, noski: hostoak eman. Zuk bezala…

—Ez esan niri aitzakiak dituzunik. —Ez zion balio izan pikondoari —Ebanjelariak dio— piku garaia ez izateak, Jauna piku bila joan zenean.

—Eta antzu geratu zen betiko.

Giza irabazpideetan dabiltzanek denbora urrea dela diote. —Gutxi deritzot: arima irabazpideetan gabiltzanontzat denbora, zerua da!

Ez dut ulertzen nola kristau zarela esan eta alfer hutsaren bizitza hori eramaten duzun. —Ahaztu al zara Kristoren bizitza lanpetuaz?

Bekatu guztiak —esan didazu—, lehenengo astialdiari itxaroten ari direla dirudi. Astialdia bera bekatu izan behar da!

—Kristorengatik lanari ekiten dionak ez du une hutsik izan behar, atsedena ez baita ezer ez egitea: ahalegin gutxiago eskatzen duten ekintzetan aritzea baizik.

Alferkerian egotea ulertezina da apostolu arima duen gizon batengan.

Ez zaitez zure garaipenetan lo gelditu. —Gizabidez ere jokaera hori egoki eta dotorea ez bada, zer gerta daiteke garaipenak —orain bezala— zureak ez, baina Jaungoikoarenak direnean?