Puntuen zerrenda

Ez du Jaungoikoa nahigabetzen bere zerbitzuan daukazun egonezin santu horrek. —Baina alferrikakoa izango da, aldi berean zure eguneroko jokaera hobetzen ez badoa.

Barne-bizitzan, gogartu al duzu astiro, borondate berrituaz «zerbitzatzearen» edertasuna?

Zure esperientziak —garrazkeria hori, urduritasun hori, samintasun hori— Jesusen hitz haien egia sentiarazten dizu: inor ezin da bi nagusiren morroi izan!

Otoitz egiten duzu, zeure burua hilduratzen duzu, apostolutzako mila lanetan sartua zaude…, baina ez duzu ikasten. —Ba, aldatzen ez bazara, ez duzu balio.

Ikastea, edozein lanbide heziketa dela, betebehar larria da gure artean.

Jaungoikoa zure adimenaren bidez zerbitzatu behar baduzu, ikastea betebehar larria da zuretzat.

A, zure handinahia, zure harrokeriak, zure haragikeria zerbitzatzen dituzun ahalegin berberaz saiatuko bazina Jaungoikoa benetan zerbitzatzen!

Satanasen «non serviam» hura emankorregia izan da. —Ez al duzu sentitzen zure baitan errebelatze oihu hura baino emankorragoa izan daitekeen «serviam» —zerbitzatuko zaitut, leial izango natzaizu!—, egunero otoitzez eta egitez esateko gogo bizia?

Oihu hau —«serviam!»— Jaungoikoaren Eliza zintzo-zintzo «zerbitzatzeko» borondatea da, baita ondasuna, ohorea eta bizitza kostata ere.

Ongi dago seme gisan, saririk gabe, eskuzabalki Jaungoikoari zerbitzatzea… —Baina ez kezkarik izan noizbait saria bururatzen bazaizu.

Aberri zaletasunak —laudagarria, noski— bere bizitza «zerbitzu», «milizia» bihurtzera darama hainbat gizaki. —Ez ahaztu Kristok ere bere «miliziak» dituela, eta bere «zerbitzurako» aukeratutako jendea.