Puntuen zerrenda

Zein gauza ederra den Bizitzagatik bizitza galtzea!

Kristo zugatik hil da. —Zuk… zer egin behar duzu Kristogatik?

Baietz esaten didazu, nahi omen duzu. —Ederki, baina diruzale batek bere urrea maite duen bezala maite al duzu, ama batek bere semea, handizale batek ohoreak, edo haragikoi gaixo batek bere atsegina?

—Ez? —Orduan, ez duzu nahi.

A, zure handinahia, zure harrokeriak, zure haragikeria zerbitzatzen dituzun ahalegin berberaz saiatuko bazina Jaungoikoa benetan zerbitzatzen!

Zer gauza gutxi den bizitza bat Jaungoikoari eskaintzeko!…

«Nesciebatis quia in his quae Patris

mei sunt oportet me esse?» —Ez al zenekiten neure Aitaren gauzetan jardun behar dudala?

Jesus gaztetxoaren erantzuna. Eta, bere semea galduta zuelakoan, hiru egunez haren bila zebilen bere Ama bezalako Ama bati emandako erantzuna. —San Mateok dakarzkigun Kristoren hitz haiek osagarritzat dituen erantzuna: «Aita nahiz ama ni baino maiteago duena ez da niretzat gai».

Jaungoikoari zeure burua munduan eskaini nahi badiozue, jakintsu baino lehen —emakumeek ez dute jakintsu izan beharrik: aski dute zentzudun izatea— espirituzaleak izan behar duzue, Jaunari ongi lotuak otoitzaren bidez: zuen zentzu eta ahalmen guztiak estaltzen dituen mantu ikustezin bat eraman behar duzue gainean: otoitz, otoitz eta otoitz; ordain, ordain eta ordain.