Puntuen zerrenda

Ez zaitez hain itsu edo burugabea izan, Jaunaren etxeen horma edo dorreak ikustean, Sagrario bakoitzaren barruan ez sartzeko. —Bera itxaroten daukazu.

Ez zaitez hain itsu eta burugabea izan, Kristo iraintzen duten lekuetatik pasatzean, Maria Sortzez Garbiari jakulatoria bat behintzat ez errezatzeko.

Ez al zara pozten zure ohiko bidea egitean hiriko kaleetan zehar, beste Sagrario bat aurkitu baduzu?

Egia da gure Sagrarioari Betania deitzen diodala beti… —Egin zaitez Maisuaren adiskideen adiskide: Lazaro, Marta, Maria. —Eta gero ez didazu berriz galdetuko zergatik deitzen diodan Betania gure Sagrarioari.

Inoiz ere ez ezazu zure anaiaz gaizki

hitz egin, arrazoiak soberan izanda ere. —Joan zaitez lehenbizi Sagrariora, eta gero Apaizarengana, zure aitarengana, eta huts ezazu harekin zure nahigabea.

—Eta beste inorekin ez.

Sagrariora hurbiltzerakoan pentsa ezazu hogei mende direla, Bera!… itxaroten daukazula.

Hor daukazu: Erregeen Errege eta Jaunen Jaun da. —Ogian ezkutatua dago.

Horretaraino beheratu zen zuganako maitasunez.

Gogozko jaunartzea, bai dela grazi iturri! —Maiz egin ezazu eta Jaungoikoaren aurrean areago bizitzeaz gain, Berarekin ere elkartuago egongo zara egintzetan.

Ez utzi Aldareko Jesusi Ikustaldia. —Ohi duzun ahozko otoitzaren ondoren, benetan Sagrarioan dagoen Jesusi konta iezazkiozu eguneko arazoak. —Eta zure kristau bizitzarako argi eta adore izango dituzu.

Badakit poz handia ematen dizudala, gure Sagrarioetako Aingeru Zaindari Santuei egindako otoitz hau kopiatuz:

Aingeruzko Espirituak, zuek zaintzen dituzue gure Sagrarioak, non gordeta dagoen Eukaristia Santuko bitxi gurgarria, babestu ezazue profanazioetatik eta gorde ezazue gure maitasunarentzat.

Haur: ez galdu Sagrarioak «erasotzeko» daukazun ohitura maitetsu hori.

Jaunartze osteko esker ematean ezpainetara datorkizun lehenengo gauza, ezinbestez, eskaria dela…: Jesus emadazu hau: Jesus, arima hura, lan hura?

Ez ardurarik izan eta ez ezazu zeure burua behartu: ez al duzu ikusten, aita ona izanik eta haurra xalo eta ausarta, haurtxoak nola sartzen dituen eskuak aitaren poltsikoan, gozoki bila, ongi etorri musua eman baino lehen? —Beraz…

«Haurtzaro bizitza» baldin baduzu, haur zarenez gero, gozozale izan behar duzu gogo bizitzan. —Oroit zaitez, zure adinekoak bezala, zure Amak gordeta dituen gauza gozoez.

Eta hori egunean sarritan. —Segundu batzuetako kontua besterik ez da… Maria… Jesus… Sagrarioa… Jaunartzea… Maitasuna… nekea… purgatorioko arima bedeinkatuak… borrokatzen ari direnak: Aita Santua, apaizak… fededunak… zure arima… zuretarren arimak… Aingeru Zaindariak… bekatariak…