Puntuen zerrenda

Ikasle: Jainkozaletasun sendo eta bizian hez zaitez, ikasketan gailendu, lanbide apostolutzaren irrika sendoa senti ezazu. —Eta zure erlijio eta zientzia heziera sendoaren bidez, hedapen azkar eta handiak agintzen dizkizut nik.

Zure kultura eraikitzeak bakarrik arduratzen zaitu. —Eta zure arima eraiki beharra dago. —Horrela lan egingo duzu behar bezala, Kristorengatik: Bera munduko Errege izan dadin, giza ekitaldi guztietan, begiak zerurantz zuzenduta, ospez jardun diren pertsonak behar dira; eta ekitaldi horietatik isilean —eta eraginkortasunez— lanbide apostolutzan lan egin dezaketenak.

Lasai gera zaitez iritzi ortodoxoa azaldu bazenuen, entzuleak, maltzurkeriaz, gaizpide hartu arren. —Fariseu gaizpidea baita harena.

Gaiztoa ez izanik gaizto itxura baldin baduzu, ergela zara. —Eta ergelkeria hori —gaizpide harri— gaiztakeria baino okerragoa da.

Erlijiotasun agerraldietan izen txarreko profesionalak «buru» bezala nabarmentzen direnean, seguraski honako hau belarrira esateko gogoa datorkizue: Mesedez, ez zaitezte hain katoliko izan!

Naturaltasuna. —Zuen gizon eta emakume kristauen bizitza —zuen gatza eta argia— berez isur dadila, bitxikeriarik gabe, txepelkeriarik gabe: eraman ezazue beti zuekin gure xalotasun espiritua.

«Eta, giro paganotu edo pagano batean, giro horrek eta nire bizitzak elkar jotzean, ez al du nire naturaltasunak gezurrezkoa irudituko?», galdetzen didazu.

—Eta erantzuten dizut: Topo egingo du, bai, zure bizitzak haienarekin: eta elkar jotze hori da, hain zuzen ere, zure sinesmena zure egintzek baieztatzen dutenez, nik eskatzen dizudan naturaltasuna.

Gatza zara zu, apostolu arima. —«Bonum est sal» —gauza ona da gatza, irakurtzen da Ebanjelio Santuan, «si autem sal evanuerit» —baina gatza gezatzen bada…, ez du ezer balio ez lurrerako, ez ongarritarako; kanpora botatzen da, alferrikako gauza bezala.

Zu gatza zara, apostolu arima. —Baina gezatzen bazara…