Puntuen zerrenda

Bere bolizko dorrean, bere oskolean sartzen den berekoiaren hala-holako zorion kaxkarra… mundu honetan lortzea, ez da gauza zaila. —Baina berekoiaren zoriona ez da iraunkorra.

Zeruaren karikatura horrengatik galdu behar al duzu Zeruko Zorion azkengabea?

Kalkulatzaile zara. —Ez esan niri gazte zarenik. Gazteriak ahal duen guztia ematen du: bere burua ere bai, neurririk gabe.

«Eska ezazu inoiz ez nadin errazenean geratu nahi». —Eskatu dut. Orain erabaki eder hori betetzen ahalegintzea dagokizu.

Jesus ez da asetzen «zatituz»: dena nahi du.

Osorik eskaini behar dugu geure burua, osorik uko egin behar diogu: buru ukamena holokausto izan behar da.

Zure ahultasun eta eskuzabaltasun ezagatik zure borondatez gaztigatu behar duzula zeure burua? —Ederki: Baina zentzuzko penitentzia izan dadila, gure etsaia eta aldi berean anaia den bati ezarritakoa bezalakoa.

Zure gogo bizitzan alfer eta arduragabea egiten zaituen lasaikeria horren aurka borroka ezazu. —Epelkeriaren hasiera izan daiteke…, eta, Eskrituraren hitzetan, Jaungoikoak bere ahotik egotziko ditu epelak.

Xaloegia zara. —Gutxi direla karitatea bizi dutenak! —Karitatea izatea ez dela arropa zaharra edo kobrezko txanponak ematea…

—Eta zuri gertatutakoagatik ilusioa galduta zaudela kontatzen didazu.

—Hauxe bakarrik datorkit burura: eman dezagun zuk eta nik zuhurkeriarik gabe, eta geure burua ere eman dezagun. Eta ezagutzen gaituztenek ez dute zure esperientzia txarra izango.

Ez zaitez erori gurpil zoroan: zuk hauxe pentsatzen duzu: hau honela edo horrela konpontzen denean izango naiz eskuzabal nire Jaungoikoarekin.

Ez ote dago Jesus zu erabat eskuzabal izatea276 ri itxaroten, Berak zuk uste baino hobeto gauzak konpontzeko?

Erabaki sendoa, bidezko ondorioa: egun bakoitzeko une bakoitzean saiatuko naiz Jaungoikoaren Nahia eskuzabalik betetzen.

Ba ote dago urre kolorezko garia, usteldu dadin, besagainka lurrera botatzea baino erokeria handiagorik? —Erokeria eskuzabal hori gabe ez legoke uztarik.

Seme: nola gabiltza eskuzabaltasunez?