Puntuen zerrenda

Gauza edo gertaera lizunez ez hitz egin inoiz, ezta kexatzearren ere. —Hara, pikea baino eranskorragoa da gai hori. —Alda ezazu solas gaia, eta ezin bada, jarrai iezaiozu, garbitasun santuaren premiaz eta edertasunaz hitz eginez, beren arimaren balioa ezagutzen duten gizonen bertuteaz.

Ongi asmatu zuen, arima eta gorputza bata bestearengandik aldendu ezin diren bi etsai eta elkar ikusi ezin duten bi adiskide direla esan zuenak.

Giza bizitza bat salbatzearren, guztien txaloak jasoz, indarra erabiltzen badugu gizaki batek ez dezan bere burua hil…, ezin ahal ote dugu behartze bera erabili —behartze santua— ergelkeriaz beren arimak hiltzen ahalegintzen diren hainbesteren Bizitza (maiuskulaz) salbatzearren?

«Haurtzaro bizitza» baldin baduzu, haur zarenez gero, gozozale izan behar duzu gogo bizitzan. —Oroit zaitez, zure adinekoak bezala, zure Amak gordeta dituen gauza gozoez.

Eta hori egunean sarritan. —Segundu batzuetako kontua besterik ez da… Maria… Jesus… Sagrarioa… Jaunartzea… Maitasuna… nekea… purgatorioko arima bedeinkatuak… borrokatzen ari direnak: Aita Santua, apaizak… fededunak… zure arima… zuretarren arimak… Aingeru Zaindariak… bekatariak…

Hori pena idealik gabeko jendetza horrek —goikoak, behekoak eta erdikoak— ematen duena! —Arima dutenik ere ez dakitela dirudi: abere talde, artalde… txerri saldo dira.

Jesus, zure Maitasun Errukiorraren laguntzaz, guk abere taldea gudaroste bihurtuko dugu, artaldea, armada…, eta txerri saldotik aterako ditugu, garbituta, aurrerantzean zikin izan nahi ez dutenak.