Puntuen zerrenda

Zure ahultasun eta eskuzabaltasun ezagatik zure borondatez gaztigatu behar duzula zeure burua? —Ederki: Baina zentzuzko penitentzia izan dadila, gure etsaia eta aldi berean anaia den bati ezarritakoa bezalakoa.

Ez pentsatu gehiago zure erorialdian. —Pentsamendu hori, zapaltzen eta estutzen zaituen harlauza izanez gain, erraz izan daiteke hurrengo tentaldien abagune. —Kristok barkatu zizun: gizon zaharraz ahatz zaitez.

Ez adorerik galdu. —Ikusi zaitut borrokan…: zure gaurko porrot hori erabateko garaipenerako saiaketa da.

Hura hutsegite eta hondamena izan zen; gure espiritua galdu zenuelako. —Badakizu, naturaz gaindi jokatuz gero, amaierak (garaipena?, garaitua izatea?, ba!) izen bakarra daukala: arrakasta.

Zu hain dohakabe izanik, nola harritzen zara besteek ere akatsak dituztelako?

Karitatearen indarra! —Zuen ahultasuna eginbeharrak betetzen tinko mantenduko zaituzten euskarri izango da, anaitasun bedeinkatua biziz gero: joko kartak zutik elkar mantentzen diren bezala, bata bestearen euskarri izanik.

Zure ahulaldiek larritzen zaituztenean, ez zaitez atsekabetu. —Zure gaitzetan harrotu zaitez, San Paulo bezala, haurrei zilegi baitzaie, barregarri geratzeko bildurrik gabe, handiak imitatzea.

Zure hutsegite eta akatsek, ezta zure erorialdi larriek ere, ez zaitzatela Jaungoikoarengandik urrundu. —Haur ahula, zentzudun bada, bere aitaren ondoan egoten saiatzen da.

Irmo: hala izan behar duzu. —Besteen edo zerorren ahulaldiek zure iraupena zalantzan jartzen badute, zure idealaren irudi kaskar bat izango dut.

Behin betiko erabaki ezazu.