Puntuen zerrenda

Normalean, jendea, bere diruari dagokionez, ez da eskuzabal izaten —idazten didazu—. Berriketa, buila eta zoramena, hitz emateak, planak. —Bere burua ukatzeko orduan, gutxi dira benetan laguntzen dutenak. Eta ematen badute ere, jolasketaren bat tartean jarrita izan behar du —dantza, tonbola, zine, gau bilera— edo egunkarietan dohain emaileen zerrenda agertzekotan.

—Iluna da, benetan, ikuskizuna, baina badu salbuespenik: zu ere, limosna ematean, eskubiak egiten duena ezkerrak jakin dezan uzten ez duten horietako bat izan zaitez.

Liburuak. —Eskua luzatu nuen, Kristoren eskale baten antzera, eta liburuak eskatu nituen. Liburuak!, gazte unibertsitario askoren adimen katoliko, apostoliko eta erromatarraren janari diren liburuak.

—Eskua luzatu nuen, Kristoren eskale baten antzera… eta, a zer ezustekoak jaso nituen!

—Zergatik ez dute ulertzen, Jesus, limosna hori kristau maitasun sakona dela, gari oneko ogia ematea baino eraginkorragoa?

Xaloegia zara. —Gutxi direla karitatea bizi dutenak! —Karitatea izatea ez dela arropa zaharra edo kobrezko txanponak ematea…

—Eta zuri gertatutakoagatik ilusioa galduta zaudela kontatzen didazu.

—Hauxe bakarrik datorkit burura: eman dezagun zuk eta nik zuhurkeriarik gabe, eta geure burua ere eman dezagun. Eta ezagutzen gaituztenek ez dute zure esperientzia txarra izango.

«Divitiae, si affluant, nolite cor apponere» —Ondasunak eskuetara badatozkizu, ez dadila zure bihotza haiei lotu. —Eskuzabalez erabiltzera adoretu zaitez. Baita heroikoki ere, behar balitz.

—Bihotzez behartsu izan zaitez.

Zenbat baliabide santu dituen pobretasunak! —Oroitzen al zara? Apostolutza lan hura diru estualdi batean zegoela, zenuen azkeneko sosa ere eman zenion.

—Eta hark—Jaungoikoaren Apaiz— honela 229 esan zizun: «nik ere daukadan guztia emango dizut». —Zu, belauniko. Eta… «Jaungoiko Ahalguztidunaren, Aitaren, Semearen eta Espiritu Santuaren onespena zugana jaitsi eta iraun beza beti», entzun zen.

—Oraindik ere, ongi ordainduta gelditu zinelako ustean zaude.