Puntuen zerrenda

Ez zaitez izan herri txikikoen aiurrikoa. —Handi ezazu zure bihotza, unibertsal, «katoliko» izateraino.

Ez hegaz egin etxeko hegaztien antzera, arranoen gisan igo zaitezkeelarik.

Taldekoi bihurtu… zu? Pilokoa!? Buruzagi izateko sortua zara eta! Gure artean ez dago lekurik epelentzat. Behera zaitez eta Kristok berriz ere Maitasunaren suaz piztuko zaitu.

Jakintsu…, buruzagi…, ausarta izateko… gogo bizian zaude.

Ederki, ederki. —Baina… Kristogatik, Maitasunagatik.

Ezkontza tropari dagokio, ez Kristoren estatu nagusiari. —Horrela, jan beharra pertsona bakoitzaren premia bada, umeak sortzea, ordea, gizadiarena da, bana-banako pertsonak alde batera utz dezaketelarik.

Seme-alaben irrika?… Semeak, seme-alabak ugari eta argi errainu ezabaezina utziko dugu gure ondoren haragiaren berekoikeriari uko egiten badiogu.

Besteak epaitzean, zure kritikari zergatik eransten diozu zure porroten samintasuna?

Betanian, Simon legendunaren etxean, Maisuaren burua urrin garestiz igurtzi zuen emakume hark Jaungoikoaren kultuan eskuzabal izan behar dugula gogoratzen digu.

—Luxu, handitasun eta edertasun guztiari ere gutxi deritzot.

—Eta ontzi sakratu, eliz jantzi eta erretaulen aberastasuna erasotzen dutenen aurka, Jesusen goraipamena entzuten da: «opus enim bonus operata est in me» —egintza ona egin du nire alde.

«Divitiae, si affluant, nolite cor apponere» —Ondasunak eskuetara badatozkizu, ez dadila zure bihotza haiei lotu. —Eskuzabalez erabiltzera adoretu zaitez. Baita heroikoki ere, behar balitz.

—Bihotzez behartsu izan zaitez.