Puntuen zerrenda

Taldekoi bihurtu… zu? Pilokoa!? Buruzagi izateko sortua zara eta! Gure artean ez dago lekurik epelentzat. Behera zaitez eta Kristok berriz ere Maitasunaren suaz piztuko zaitu.

Ez zaitzala atzeman honako ezaugarri hauek dituen izaeraren eritasunak: finkotasunik eza gauza guztietarako, txoriburukeria hitz eta eginetan, burugabekeria…: hitz batez, arinkeria.

Eta eguneroko egitasmo huts horiek («hutsez bete-beteak») egitera bultzatzen zaituen arinkeriak —ez ahaztu—, garaiz ez erreakzionatuz gero —bihar ez: orain!—, zure bizitza txotxongilo hil, gauzaeza bihurtuko du.

Harea zakua bezala zaude. —Zure aldetik ez duzu ezer egiten. Eta bide horretatik, ez da harritzekoa epelkeriaren sintomak sentitzen hastea. —Erreakziona ezazu.

Zure gogo bizitzan alfer eta arduragabea egiten zaituen lasaikeria horren aurka borroka ezazu. —Epelkeriaren hasiera izan daiteke…, eta, Eskrituraren hitzetan, Jaungoikoak bere ahotik egotziko ditu epelak.

Min ematen dit epelkeri arriskuan zaudela ikusteak, zure egoeraren barruan perfekzioa serioski bilatzen ez zaitudanean ikusten.

Esazu nirekin batera: ez dut epelkeriarik nahi!: «confige timore tuo carnes meas!» —Emadazu, ene Jaungoiko, erreakzionaraziko didan seme beldurra!

Badakit bekatu larrietatik ihes egiten duzula. —Salbatu nahi duzu! —Baina bekatu arinetan etengabe eta nahita erortzeak ez dizu axola, aldi bakoitzean zeure buruari uko egiteko Jaungoikoaren deia sentitu arren.

—Zure epelkeriak dakarkizu borondate txar hori.

Zein kaxkarra den zure Jainko Maitasuna, bekatu larria ez delako borrokarik gabe etsitzen duzunean!

Bekatu arinek kalte handia egiten diote arimari. —Beraz, «capite nobis vulpes parvulas, quae demoliuntur vineas», esatendu Jaunak «Kantarik Ederrenean»: harrapa itzazue mahastia hondatzen duten azerikumeak.

A zer lastima ematen didazun zure bekatu arinen damurik sentitzen ez duzun bitartean! —Ordurarte ez baitzara hasiko benetako barne-bizitza izaten.

Epel zara, nagikeriaz eta gogo txarrez egiten badituzu Jaunari dagozkion gauzak; azpikeriaz edo maltzurkeriaz, zure eginbeharrak nola murriztuko dituzun bila bazabiltza; zeure burua eta zure patxada baizik ez badituzu gogoan; zure solasaldiak alferrikakoak eta hutsak baldin badira; bekatu arina gorrotatzen ez baduzu; giza asmoz jokatzen baduzu.

Aspertzen zara? —Izan ere, zentzuak erne eta arima lotan dauzkazu.

Zein negargarria, «Jainko gizon» galbideratua! —Baina are eta negargarriagoa «Jainko gizon» epel eta munduzalea!