Puntuen zerrenda

Zenbat balio duzun bazeneki!… —San Paulo da hau esaten dizuna: «pretio magno» —prezio handian— erosia izan zara.

Eta gero hauxe esaten dizu: «glorificate et portate Deum in corpore vestro» —gorets ezazu Jaungoikoa eta eramazu zure gorputzean.

Penitentziari beldurra diozu?… Betiko Bizitza lortzen lagunduko dizun penitentziari. —Ez al duzu ikusten, ordea, nola jasaten dituzten gizakiek ebakuntza odoltsuen oinazeak, bizitza gaixo honi eustearren?

Gizakiaren bizitza lur gainean milizia dela, mendeak dira Jobek esan zuela.

—Oraindik ere bada hori ikasi ez duen patxadazalerik.

Giza bizitza bat salbatzearren, guztien txaloak jasoz, indarra erabiltzen badugu gizaki batek ez dezan bere burua hil…, ezin ahal ote dugu behartze bera erabili —behartze santua— ergelkeriaz beren arimak hiltzen ahalegintzen diren hainbesteren Bizitza (maiuskulaz) salbatzearren?

Zer gauza gutxi den bizitza bat Jaungoikoari eskaintzeko!…

Amets… labur den hemengo bizitza honetan jasan egiten duzu… —Poztu zaitez: zure Aita Jaungoikoak asko maite zaituelako, eta, oztoporik jartzen ez baduzu, amets gaizto honen ondoren esnatze on bat emango dizu.

Gau txar bat ostatu txar batean. —Horrela deskribatu omen zuen mundu honetako bizitza Ama Teresa Jesusenak. —Ez al da konparazio egokia benetan?

Beti. —Betirako! —Gizakiei atsegin zaien gauzak luzatzearren —betikotzearren— gehiegi erabilitako hitzak

Hitz gezurtiak gauza guztiak amaitzen diren lur honetan.

Hemengo hau, etengabeko amaitze bat da: hasi baino lehen amaitzen da atse-

gina.

Bizitzak Jaungoikoaren aintza helburutzat ez balu, arbuiagarria litzateke, areago: gorrotagarria.