Puntuen zerrenda

Ez galarazi Parakletoaren lana: Kristorekin bat egin zaitez, zure arima garbi dadin, eta Berarekin batera senti itzazu irain, txistu eta zartakoak…, eta arantzak, eta gurutzearen zama…, eta baita ere zure haragia urratzen dituzten burdinak, eta babesik gabe hiltzeko irrika.

Eta sar zaitez Jesus Gure Jaunaren saihets irekian, haren Bihotz zaurituan babes sendoa aurkitzeraino.

Eskuineko begia galbide bazaizu…, atera eta bota ezazu zugandik urruti! —Bihotz gaixoa, bera da galbide zaizuna!

Zapaldu, estutu ezazu eskuen artean: ez iezaiozu atseginik eman. —Eta eskatzen dizkizunean, erruki jatorrez beterik, esaiozu poliki, isilmandatu gisan: «Bihotza, Gurutzean bihotza!, Gurutzean bihotza!».

Sar zaitez Kristo Gurutziltzatuaren zaurietan. —Han ikasiko duzu zure zentzuak gordetzen, barne-bizitza izango duzu, eta etengabe eskainiko dizkiozu Aitari Jaunaren eta Mariaren oinazeak, zure zorren eta gizakien zor guztien ordainez.

Esazu: Ene Ama —zurea, zu berea baitzara arrazoi askorengatik—, zure maitasunak lot nazala zure Semearen Gurutzera: ez dakidala falta ez Sinesmenik, ez, adorerik, ez ausardiarik gure Jesusen nahia betetzeko.

Gurutzea, lanak, nahigabeak: bizi zaren bitartean izango dituzu. —Kristo bide horretatik ibili zen eta ez da ikaslea Maisua baino gehiago.