Puntuen zerrenda

Zuzendaria. —Behar duzu. —Zeure burua eskaini, eman dezazun…, obedituz. —Eta zure apostolutza ezagutzen duen Zuzendaria, hain zuzen, Jaungoikoaren nahia dakiena: horrela, zure bidetik atera gabe, Espiritu Santuak zure ariman egiten duen lana eraginkortasunez lagunduko du…, bakez betetzen zaituelarik eta zure lana emankorra izateko modua erakusten dizularik.

Ez al duzu sumatzen bake eta batasun handiagoa izango duzula, erabateko askatzea eskatzen dizun ezohiko grazia horri erantzuten diozunean?

—Berarengatik borroka ezazu, Berari atsegin ematearren: baina sendotu ezazu zure esperantza.

Zauri horrek min ematen du. —Baina sendatzen ari da: eutsi zure erabakiei. Eta nahigabea laster bake gozo bihurtuko da.

Bazter itzazu bakea kentzen dizuten eskrupulo horiek. — Arimari bakea ebasten diona ez dator Jaungoikoagandik.

Jaungoikoa etortzen zaizunean, agur haien egia nabarituko duzu: bakea ematen dizuet…, bakea uzten dizuet…, bakea zuei…, eta hori, nahigabeen artean.

Zuk idatzi didazunatik kopiatzen dut: «Nire poza eta nire bakea. Inoiz ezingo dut egiazko alaitasunik izan bakerik ez badut. Eta, zer da bakea? Borrokarekin zerikusi estua duen zerbait da bakea. Bakea garaipenaren ondorioa da. Bakeak etengabeko borroka eskatzen dit. Borrokarik gabe ezingo dut bakerik izan».

Marmarra, apostolutza lohitu eta oztopatzen duen herdoila da. —Karitatearen aurka doa, indarrak gutxitzen ditu, bakea kentzen, eta Jaungoikoarekin bat egitea galarazten du.

Ba al dakizu pertsona hark arriskuan daukala arima? —Urrundik, zure batasun bizitzaren bitartez, laguntza bikaina izan zaitezke berarentzat. —Tira, ba! eta ez zaitez larritu.

Zure anaiengatik sentitzen dituzun kezka horiei ongi deritzot: zuen elkar maitasunaren ezaugarri dira. —Hala ere, kontu izan zure kezka horiek urduritasun bihur ez daitezen.

Apaltasuna barne-bakea lortzeko beste bide on bat da. —«Berak» esana da: «Ikasi niregandik, otzan eta bihotz-apala bainaiz ni… eta bakea aurkituko duzue zuen arimentzat».

Esanekotasunak bakerik ematen ez badizu, harroa zara.

Nahigabe larria jasaten ari zara? —Atsekabeak dituzu? Esan, astiro-astiro, ahogozatuz, otoitz sendo eta gizontsu hau:

«Egin bedi, bete bedi, laudatua eta beti goratua izan bedi Jaungoikoaren Nahi txit zuzena eta maitagarria, gauza guztien gainetik. —Amen. —Amen».

Bakea lortuko duzula ziurtatzen dizut nik.

Nahigabea bihotz-uzkurturik hartzen baduzu, alaitasuna eta bakea galtzen dituzu eta estuasun hartatik onura espiritualik gabe ateratzeko zorian jartzen zara.