Puntuen zerrenda

Ez duzu inoiz ere «egia agortu» nahi. —Gizalegez, batzuetan. Beste batzuetan —gehienetan— zeure burua ez larritzearren. Zenbaitetan besteak ez larritzeko. Eta beti, koldarkeriaz.

Horrela, sakontzeari diozun beldur horrekin, inoiz ez zara irizpide zuzeneko gizon izango.

Ez egiaren beldurrik izan, egiak heriotza badakarkizu ere.

Amore eman? —Borrokarako gogorik ez dutenen —patxadazale, maltzur, koldarren— lexikoan baizik aurkitzen ez den hitza da —amore eman behar da!—, aldez aurretik baitakite garaituak daudela.

Gizon prestu… moldagarri batek, berriz ere heriotzara kondenatuko luke Jesus.

Amore ematea egiaren jabe ez izatearen seinale ziurra da. —Pertsona bat ideal, ohore edo Sinesmen gauzetan moldagarri denean, pertsona hori… ez idealik, ez ohorerik, ez Sinesmenik ez duen pertsona da.

Gizon! Barregarri utz ezazu. —Esaiozu ez dagoela modan: gezurra dirudi oraindik ere dilijentzian bidaiatzea sistema ona dela sinetsi nahian dabilenik izatea… —Hori, peluka hautseztatuen garaiko Voltaire-ren ideiak edo XIX. mendeko liberalismo zaharkituarenak berritu nahi dituztenentzat.