Puntuen zerrenda

Barne-bizitzan, gogartu al duzu astiro, borondate berrituaz «zerbitzatzearen» edertasuna?

Jesusen Historia hura oparitu nizunean, eskaintza hitz hauek jarri nituen: «Kristo bila dezazula: Kristo aurki dezazula: Kristo maita dezazula».

—Hiru ekinaldi garbi dira. Saiatu al zara, behinik behin, lehenengoa bizitzen?

Satanasen «non serviam» hura emankorregia izan da. —Ez al duzu sentitzen zure baitan errebelatze oihu hura baino emankorragoa izan daitekeen «serviam» —zerbitzatuko zaitut, leial izango natzaizu!—, egunero otoitzez eta egitez esateko gogo bizia?

Etsi?… Onartu?… Jaungoikoaren Borondatea nahi izan!

Jaungoikoaren Nahia erabat onartzeak poza eta bakea dakartza nahitaez: zoriona Gurutzean. —Orduan ikusten da Kristoren uztarria leuna dela eta bere zama arina.

Bakea, bakea! esaten didazu. —Bakea… borondate «oneko» gizakientzat da.

Jaungoikoaren Nahiarekin bat egiteko otoitza:

Zuk nahi duzu, Jauna?… Nik ere nahi dut!

Ez zalantzan ibili: Oparia burutuko duen «Fiat» —egin bedi!— bihotzetik ezpainetara ateratzen utz ezazu.

Lurrean zoriontsu izateko sekretua, nork bere burua Jaungoikoaren Nahian uztea da. —Esazu, bada: «meus cibus est, ut faciam voluntatem ejus» —nire janaria haren Nahia egitea da.