Puntuen zerrenda

Ez errietan hasi egindako hobenak haserre sentiarazten zaituenean. —Itxaron hurrengo eguneraino, edo gehiago oraindik. —Eta gero, lasai eta asmoa garbiturik, ez utzi errieta egiteari. —Hiru orduko borrokaren bitartez baino gehiago irabaziko duzu hitz gozo bakar baten bidez. —Mantsotu ezazu zure jenioa.

Otoitz gizon ez bazara, ez dut zure asmo zuzentasunean sinesten, Kristogatik lanean ari zarela diozunean.

Otoitz arima batek honela zioen: asmoetan, izan dadila Jesus gure helburu; nahietan, gure Maitasun; hizketan, gure gai; egintzetan, gure eredu.

Epel zara, nagikeriaz eta gogo txarrez egiten badituzu Jaunari dagozkion gauzak; azpikeriaz edo maltzurkeriaz, zure eginbeharrak nola murriztuko dituzun bila bazabiltza; zeure burua eta zure patxada baizik ez badituzu gogoan; zure solasaldiak alferrikakoak eta hutsak baldin badira; bekatu arina gorrotatzen ez baduzu; giza asmoz jokatzen baduzu.

Bihotz zuzena eta borondate ona: bi gauza hauek izanik eta Jaungoikoaren nahia betetzeari begira zaudela, zure Maitasun ametsak beteta eta zure arimekiko egarria ase ikusiko dituzu.

Beti ere ikuskizuna! —Argazkiak, grafikoak, estadistikak eskatzen dizkidazu.

—Ez dizut material hori bidaltzen, zeren —kontrako iritzia errespetatuz ere— munduan goratu nahian lan egiten nuela uste izango bainuen gero…, eta nik zerura igo nahi dut.

Ados nago: kanpotik borroka handia dago eta hori nolabait aitzakia da zure alde. —Baina barrutik badago ere gaizkidetasunik —begira ezazu astiro— eta horretan ez dut aitzakiarik ikusten.

Larritu eta tristatu egiten zara zure Jaunartzeak hotzak, lehorrak direlako. —Sakramentua hartzera zoazenean, esadazu: zeure buruaren bila ala Jesusen bila zoaz? —Zeure burua bilatuz gero, baduzu tristatzeko arrazoirik… Baina —behar bezala— Kristo bilatzen baduzu, Gurutzea baino seinale hoberik nahi al duzu, aurkitu duzula jakiteko?

Gizaki errukarriok eskuartean ditugun gauza guztiak —baita santutasuna ere— huskeriez ehundutako oihal bat da; gure asmo zuzentasunaren arabera, heroismo edo doilorkeriaz, bertute edo pekatuz osa dezaketen tapiz bat.

Gesta kantak abentura harrigarriak kontatzen dituzte beti, baina heroiaren etxeko gertakizun txikiekin nahasturik. —Beti aintzakotzat hartuko ahal dituzu —bide zuzena!— gauza txikiak!

Jaungoikoaren hitza espiritu kritikoz entzutea jarrera txarra da.