Puntuen zerrenda

Ez zaitez kezkatu, edozer gauza gertatu arren, amore ematen ez baduzu. —Nahimenak bakarrik ireki baitezake bihotzaren atea, eta gauza nardagarri horiek bere barruan sartu.

Izakiak zuretzat? —Izakiak Jaungoikoarentzat: izatekotan, zuretzat, Jaungoikoaren bidez.

Aska zaitez izakiengandik, biluzik gelditzeraino. Zeren —San Gregorio Aita Santuak dioenez— deabruak ezer ez baitu berea denik mundu honetan, eta biluzik doa borroka egitera. Zu jantzita baldin bazoaz borrokara haren kontra, laster lurrera eroriko zara: nondik heldu izango baitu.

Badirudi hauxe esaten dizula zure Aingeruak: Bete-beterik daukazu bihotza giza zalekeriaz!… —Eta gero: zure Zaindariak hori zaintzea nahi al duzu?

Orain, negar-malkoak. —Min egiten dizu, ezta? —Jakina, ba!: hain zuzen ere, horregatik jo zaituzte hor.

Adorea galduta dabil zure bihotza eta euskarriren bat bilatzen duzu munduan. —Ongi dago: baina erne egon zaitez, ez erortzeko bilatzen duzun laguntza hori herrestan eramango zaituen zama, esklabo egingo zaituen kate bihur ez dadin.

Esadazu, esadazu: hori… adiskidetasuna ote da ala katea?

Nola dabil bihotz hori? —Ez zaitezkezkatu: santuek ere —zu eta ni bezala, pertsona ongi eratuak eta normalak zirenez— «izaeraren» joera berberak sentitzen zituzten. Eta sentitu ez balituzte, merezimendu eskasekoa izango litzateke beren bihotzak —gorputz eta arima— beste gizaki bati eman ordez, Jaungoikoarentzat gordetzeko «izaeraz gaindiko» erreakzioa.

Horregatik, bidea ikusiz gero, bihotzaren ahultasuna ez da oztopo izan behar arima ausart eta «arras maiteminduarentzat».

Begiak! Begien bidez gaiztakeria asko sartzen da bihotzean. —Zenbat esperientzia Davidenaren antzeko!… —Begiak gordez gero, zuen bihotza ziur gordetzen duzue.

Hara, bihotza saltzaile hutsa da. —Zazpi giltzaz itxita eduki ezazu.

Ama Birjina Santuak, Maitasun Ederraren Amak, lasaituko du zure bihotza, haragizkoa dela sentiarazten dizunean, Berarengana uste osoz bazoaz.