Puntuen zerrenda

Nahigabeak lur jota uzten zaitu, uzkurturik hartzen duzulako. —Har ezazu ausarki, kristau espirituz: eta altxorra bailitzan ederretsiko duzu.

Zure ahultasun eta akatsen lekuko izan badira, zer axola dio zure penitentziarenak ere izateak?

Zein gauza ederra den Bizitzagatik bizitza galtzea!

Penitentziari beldurra diozu?… Betiko Bizitza lortzen lagunduko dizun penitentziari. —Ez al duzu ikusten, ordea, nola jasaten dituzten gizakiek ebakuntza odoltsuen oinazeak, bizitza gaixo honi eustearren?

Santuen Elkartasuna sentitzen baduzu —bizitzen baduzu—, penitentzia gogoko duen arima izango zara. —Eta penitentzia «gaudium, etsi laboriosum» —poza, nahiz eta neketsua— dela ulertuko duzu: eta izan diren, orain diren eta izango diren arima penitentziagile guztien «elkarkide» sentituko zara.

«Ideo omnia sustineo propter electos» —dena jasaten dut hautatuengatik, «ut et ipsi salutem consequantur, quae est in Christo Jesu» —beraiek Kristo Jesusengan dagoen salbamena lor dezaten.

—Santuen Elkartasuna bizitzeko modu bikaina!

—Eskaiozu Jaunari San Pauloren espiritu hori bera eman diezazula.

Ez al duzu Maisuaren ahotik entzun mahatsondoa eta aihenen parabola? —Arindu ezazu bihotza: fruitu ematen duen aihen zarelako eskatzen dizu gehiago… Eta inausten zaitu «ut fructum plus afferas» —fruitu ugariago eman dezazun.

Jakina!: mozte horrek, erauzte horrek, min ematen du. Baina gero, a zer nolako fruitu mardulak eta nolako egintza helduak!

Jaungoikoari zeure burua munduan eskaini nahi badiozue, jakintsu baino lehen —emakumeek ez dute jakintsu izan beharrik: aski dute zentzudun izatea— espirituzaleak izan behar duzue, Jaunari ongi lotuak otoitzaren bidez: zuen zentzu eta ahalmen guztiak estaltzen dituen mantu ikustezin bat eraman behar duzue gainean: otoitz, otoitz eta otoitz; ordain, ordain eta ordain.

Hara!: Hainbestetan «Gurutzea, Jauna, Gurutzea!» eskatu ondoren, zure gogoko gurutzea nahi zenuela ageri dago.