Puntuen zerrenda

Ez zaitezte eztabaidan ari. —Eztabaidak ez du argirik ematen, beroaldiak itzaltzen baitu.

Ez duzu inoiz ere «egia agortu» nahi. —Gizalegez, batzuetan. Beste batzuetan —gehienetan— zeure burua ez larritzearren. Zenbaitetan besteak ez larritzeko. Eta beti, koldarkeriaz.

Horrela, sakontzeari diozun beldur horrekin, inoiz ez zara irizpide zuzeneko gizon izango.

Amorerik ez ematea, soilik, ez: «amorerik ez emate santua» baizik.

Ez dezagun ahatz badagoela ere «behartze santu» bat.

Ez egin ezezko kritikarik: Goretsi ezin duzunean, isil zaitez.

Ez dezagun epaitu nahi. —Bakoitzak bere ikuspuntutik begiratzen ditu gauzak… eta ia beti bere adimen laburrez, eta, maiz, beroaldiak ilundutako begi lausoez.

Gainera, pintore modernista horiena bezala, oso subjektiboa eta gaixotia da pertsona batzuen ikuspegia: nolanahiko zirriborro batzuk egin eta gero, gure erretratua, gure jokaera dela ziurtatzen digute.

Zein gutxi balio duten gizakien iritziak! —Ez ezazue epaitu zuen iritzia otoitzean bahetu gabe.