Puntuen zerrenda

Alden itzazu zugandik, gutxienez denbora galarazten dizuten alferrikako gogoeta horiek.

Sinesmena, poza, baikortasuna. —Baina errealitatearen aurrean begiak zoro-zoro ixterik, ez.

Ilusioa galduta. —Lur jota zatoz. Gizakiek eskarmentua eman dizute! —Ez zenituela behar uste zuten bitartean, eskaintza ugari egiten zizuten. Diru laguntza eman behar ote zizuten pentsatzeak —txanpon gutxi batzuk— haien adiskidetasuna axolagabetasun bihurtu zuen.

—Jaungoikoagan bakarrik jar ezazu zure uste ona eta Harengatik zuri lotuak daudenengan.

Apostolutza enpresetan mundu honetako baliabideak (2 + 2 = 4) aintzakotzat hartzea ongi dago —betebehar bat da—, baina ez ahaztu —inoiz!— beste batugai bat kontuan hartu behar duzula, zorionez: Jaungoikoa + 2 + 2…

Ez utzi gauzak egin gabe tresnarik ez edukitzeagatik: ahal den bezala hasten da. —Gero betekizunak berak sortzen du erabidea. Balio ez zuten batzuk, gai gertatzen dira. Besteei ebakuntza bat egiten zaie, nahiz eta min eman —«zirujau» bikainak izan dira santuak!—, eta aurrera segitzen da.

Berriz ere…: Esan dutela, idatzi dutela…: Alde, aurka…: Borondate onez eta ez hain onez…: Erdi esanak eta gezur beltzak, gorespen eta gorazarreak…: tontakeriak eta ongi esanak…

—Burugabe, burugabekote!: Zer axola zaizu, buru-bihotzak Jaungoikoaz mozkortuta, zuzen-zuzen zure helburura zoazelarik, haizearen hotsa edo txitxarraren doinua, edota orroa, kurrinka, irrintzia?…

Gainera… ezinbestekoa da hori: ez zaitez haizeari ateak jarri nahian ibili.

Gorputz erorialdia. —Lur jota zaude.

—Atseden har ezazu. Utzi kanpoko eginkizun horiek. —Joan zaitez medikuarengana. Obedi ezazu eta ez ardurarik izan.

Laster itzuliko zara lehengo bizimodura eta, zintzo bazara, zure apostolutza lanak ere hobeto beteko dituzu.

Nola barre eginarazi didazun eta nola pentsarazi, aspaldiko egi hau esatean!: nik… muturretik sartzen ditut beti iltzeak.