Puntuen zerrenda

Zuk… munduko maitasun kaxkar batengatik hainbeste beheratze jasan dituzun horrek, benetan uste al duzu Kristo maite duzula, eta ez duzu beheratze hori jasan nahi, Berarengatik!

Edan dezagun bizitza errukarri honetan nekearen kalizatik azken tantaraino. —Zer axola dio hamar, hogei, berrogeita hamar urtetan jasateak…, gero zerua betiko…, beti-betiko baldin bada?

—Eta, batez ere —lehen aipatutako arrazoia, «propter retributionem», baino hobeto—, zer axola dio jasateak Jaungoiko gure Jauna poztu eta Berari atsegin ematearren, Berarekin Gurutzean loturik jasanez gero, ordaintzeko asmoz, hitz batean: Maitasunez eramaten badugu?

Ez zarela… inor. —Beste batzuek antolaketa, prentsa eta propaganda alorretan gauza bikainak egin dituztela eta orain ere egiten dituztela. —Baliabide guztiak dituztela eta zuk, ordea, batere?… Ederki, Ignazioz oroit zaitez:

Alkala-ko doktoreen artean, ezikasia. —Pobrea, ezin pobreago, Pariseko ikasleen artean. —Jazarria, iraindua.

Hori duzu bidea: maita eta sinets ezazu eta, jasan!: zure Maitasuna, zure Fedea eta zure Gurutzea dira bihotzean daramazun apostolutza irrika gauzatu eta betikotzeko bide hutsezinak.

«Ideo omnia sustineo propter electos» —dena jasaten dut hautatuengatik, «ut et ipsi salutem consequantur, quae est in Christo Jesu» —beraiek Kristo Jesusengan dagoen salbamena lor dezaten.

—Santuen Elkartasuna bizitzeko modu bikaina!

—Eskaiozu Jaunari San Pauloren espiritu hori bera eman diezazula.

«Ezin da erro eta adaburu izan, zuhaitz izerdi, espiritu, barnetik doan zerbait izanik baizik».

—Hitz hauek idatzi zizkizun adiskideak bazekien handizale zintzoa zinela. —Eta bidea erakutsi zizun: diskrezioa, ukamena, barnetik ibiltzea!

Ez zalantzan ibili: Oparia burutuko duen «Fiat» —egin bedi!— bihotzetik ezpainetara ateratzen utz ezazu.

Ziztada bat. —Eta beste bat. Eta beste bat. —Jasan itzazu, gizon! Ez al duzu ikusten, hain txikia izanik, gurutze txiki horiek baizik ezin dituzula eskaini zure bizitzan —zure bidetxoan?

Gainera, begira ezazu: gurutze bat bestearen gainean —ziztada bat…, eta beste bat…, bai pila handia!

Azkenean, haurra, gauza handi bat egiten ikasi duzu: Maitatzen.