Puntuen zerrenda

Beti Jaungoikoaren aurrean bizitzeko, erabil itzazu aholkatu nizkizun «giza maina» santu haiek: jakulatoriak, Maitasun eta ordain egintzak, gogozko jaunartzeak, Ama Birjinaren irudiari «begiradak»…

Isiltasuna barne-bizitzaren atezaina bezalakoa da.

Zure Gurutzea. —Kristau zarenez, beti eraman behar zenuke zurekin zure Gurutzea. Eta lanean, mahai gainean ipini. Eta musu eman lotara joan aurretik eta esnatzean: eta zure arimaren aurka zure gorputz gaixoa altxatzen denean, musu emaiozu ere.

Eguberriko jaiera. —Jaiotzaren kortxozko mendiak antolatzen eta buztinezko irudi xumeak Estalpearen inguruan jartzen ikusten zaitudanean ez dut irribarrerik egiten. —Inoiz ez zaitut hain gizon ikusi, orain, haur bat dirudizun une honetan baino.

Ez ezazu izan nahi eraikin handiaren urre koloreko haizorratz hura bezala: distira handia izanagatik eta goi-goian egon arren, ez du zer ikusirik eraikinaren sendotasunarekin.

—Zimenduetan lurperatua dagoen harlandu zaharra izango bazina, inork ikusi ezin zaitzakeen lekuan gordeta!: zuri esker ez da eroriko etxea.

Honela idazten didazu: «Guztiok daukagun gogo bizia, “hau” martxan jarri eta zabaldu dadin, urduritasun bihurtuko dela dirudi. Noiz hautsiko du, noiz lehertuko… noiz izango da gurea mundua?».

Eta hau eransten duzu: «gure guraria ez da alferrikakoa izango Jauna “behartzen”, bultzatzen, erabiltzen badugu: orduan izugarri ondo irabazia dugu denbora».

Ulertzen dut zure ezinbesteko geldi egote horrek sortzen dizun bihozmina oraindik egiteko dagoen lanean pentsatzen duzunean. —Bihotza ez zaizu planeta osoan sartzen, eta lan ofizial ezin txikiago batera egokitu behar da.

Baina, noizko uzten dugu «fiat» hori?…