Puntuen zerrenda

«Infelix ego homo!, quis me liberabit de corpore mortis hujus?» —Ene zoritxarra!, nork askatuko nau heriotzako gorputz honetatik? —Horrela oihu egiten du San Paulok. —Adoretu zaitez: berak ere borrokatzen zuen.

Gure Amarenganako maitasuna, zure epelkeriaren hausberoan ezkutaturik dauden bertute txingarrak su bizi bihurtuko dituen haizea da.

Maita ezazu Andre Maria. Eta Berak lortuko dizu eguneroko borrokan garaile irtetzeko grazia ugaria. —Eta ezertarako ez diote balio izango etsaiari zure barruan bor-bor altxatzen diren gauza gaizto horiek, beraien usain gozoko usteltasunez Kristok berak zure bihotzean ipinitako ideal handi eta agindu bikainak ito nahian. —«Serviam!».

Ama Birjina Santuak, Maitasun Ederraren Amak, lasaituko du zure bihotza, haragizkoa dela sentiarazten dizunean, Berarengana uste osoz bazoaz.

Lehen, bakarrik, ezin zenuen… —Orain Andre Mariarengana jo duzu, eta, Berarekin, bai erraz!

Izan konfiantza. —Itzul zaitez. —Eskaiozu Andre Mariari eta zintzo izango zara.

Gero eta indar gutxiago duzula? —Zergatik ez diozu zure Amari esaten: «consolatrix afflictorum, auxilium christianorum…, Spes nostra, Regina apostolorum»?

Ama! —Ozenki dei iezaiozu. —Entzuten dizu, agian arriskuan ikusten zaitu eta, bere Semearen graziaren bidez, zure Ama Santa Mariak bere magalaren atsegina eta bere laztanen xamurtasuna eskaintzen dizu: eta indarberritua aurkituko zara borroka berri baterako.

Oso sakona izan da zure erorialdia! —Has zaitez zimenduak hor behean jartzen. —Apal izan zaitez. —«Cor contritum et humiliatum, Deus, non despicies». —Jaungoikoak ez du gutxietsiko bihotz apal eta damutua.

Ez inoiz etsi. Lazaro hila eta usteldua zegoen: «jam foetet, quatriduanus est enim» —Kiratsa dario, lau egun baitaramatza lurperatua, esaten dio Martak Jesusi.

Jaungoikoaren goiargia entzun eta jarraitzen badiozu— «Lazare, veni foras!» —Lazaro, zatoz kanpora!—, Bizitzara itzuliko zara.

Zure eraikin espirituala kulunkatzen bada, dena airean dagoela iruditzen bazaizu…, Jesus eta Mariarenganako konfiantzan oinarritu zaitez, harri tinko eta ziur horren gainean eraiki behar izan baitzenuen hasieratik.

Bihotzean su eta ur, hotz eta bero, grinatxoak eta Jaungoikoa dituzula esaten didazu…: kandela bat San Migeli piztua eta bestea deabruari.

Lasaitu zaitez: borroka jarraitu nahi duzun bitartean, ez daude bi kandela, bat bakarra baizik, Goiaingeruarena.