Puntuen zerrenda

Zure bertutea ez dadila bertute ozena izan.

Horren izena hauxe da: xuxurla, marmar, istilu, nahaste, esamesa, istorio, azpijoko…, gezur beltz?, bilaukeria?

—Gauza zaila da, eman behar ez duenaren «irizpide emate» hori, «atso berritsuen kalaka» ez bihurtzea.

Ez duzu pobretasun espiriturik, inor konturatu gabe zerbait aukeratzerakoan, zuretzat ez baduzu txarrena aukeratzen.

Ez zaitez ahalegindu «uler» zaitzaten. —Jaungoikoagandik dator ulertu ezin hori: zure buru-ukamena ezkutuan igaro dadin.

«Ezin da erro eta adaburu izan, zuhaitz izerdi, espiritu, barnetik doan zerbait izanik baizik».

—Hitz hauek idatzi zizkizun adiskideak bazekien handizale zintzoa zinela. —Eta bidea erakutsi zizun: diskrezioa, ukamena, barnetik ibiltzea!

Ez dizut inoiz behar adina goraipatuko diskrezioaren garrantzia.

—Zure borroka armaren ahoa ez bada ere, eskutokia dela esan diezazuket.

Nolako grina dagoen munduan bakoitza bere lekutik irtetzeko! —Zer gertatuko litzateke, giza gorputzeko hezur edo gihar bakoitzak ez dagokion lekua hartu nahi balu?

Ez da bestelakoa munduko ondoezaren arrazoia. —Iraun ezazu zure lekuan, seme: zenbat egin dezakezun hortik Gure Jaunaren egiazko erregetzaren alde!

«Non manifeste, sed quasi in occulto» —ez agerian, ezkutuan baizik: horrela doa Jesus Etxola Jaietara.

Horrela joango da Emaus aldera, Kleofas eta haren lagunarekin. —Horrela ikusten du, berpiztuta, Magdalako Mariak.

Eta horrela —«non tamen cognoverunt discipuli quia Jesus est» —ikasleak ez ziren konturatu Jesus zela—, horrela joan zen San Joanek kontatzen digun mirarizko arrantzara.

Are eta ezkutuago dago Ostian, gizakienganako Maitasunez.

Ezespena eta jazarpena Jainko Maitasunaren seinale bedeinkatuak dira, baina ez dago seinale eta ezaugarri ederragorik hau baino: ezkutuan igarotzea.