Puntuen zerrenda

Hildurazale ez bazara, inoiz ez zara otoitz arima izango.

Ez dago ukamenik gabe burutzen den idealik. —Zeure buruari uko egin iezaiozu. —Zein gauza ederra den biktima izatea!

Edan dezagun bizitza errukarri honetan nekearen kalizatik azken tantaraino. —Zer axola dio hamar, hogei, berrogeita hamar urtetan jasateak…, gero zerua betiko…, beti-betiko baldin bada?

—Eta, batez ere —lehen aipatutako arrazoia, «propter retributionem», baino hobeto—, zer axola dio jasateak Jaungoiko gure Jauna poztu eta Berari atsegin ematearren, Berarekin Gurutzean loturik jasanez gero, ordaintzeko asmoz, hitz batean: Maitasunez eramaten badugu?

Munduak buru ukamen ikusgarria bakarrik miresten du, ez baitu buru ukamen ezkutu eta isilaren balioa ezagutzen.

Paradoxa: Bizitzeko hil egin behar da.

Jaungoikoarengana zuzentzen ez zaituen guztia eragozpen zaizu. Kendu eta bota ezazu urrutira.

Garaitu ezazu egunero zeure burua lehen unetik, puntu-puntuan jaikiz, ordu jakinean, minutu bat ere alferkeriari eman gabe.

Jaungoikoaren laguntzaz zeure buruari uko egiten badiozu, asko aurreratu duzu egun osorako.

Lehenengo borrokaldian garaitua sentitzeak, nola kikiltzen duen!

Beti garaitua irtetzen zara. —Har ezazu helburutzat, aldi bakoitzean, arima jakin baten salbamena, edo haren santutasuna, edota apostolutzarako deia… —Horrela ziur nago zure garaipenaz.

Gorputzari bidezkoa baino pixka bat gutxiago eman behar zaio. Bestela, saldukeriaz ordaintzen gaitu.

Gari alea hiltzen ez bada antzu geratzen da. —Ez al duzu gari ale izan nahi, hilduraren bidez hil, eta galburu joriak eman? —Jesusek bedeinka dezala zure garidia!

Milaka ikusle harrituen aurrean beren burua gurutziltzatzen utziko luketen zenbat eta zenbatek ez dakite, ordea, eguneroko ziztadak kristau eran eramaten! —Pentsa ezazu, orduan, zer ote den heroikoago.

Zein gutxi balio duen penitentziak etengabeko hildurarik gabe!