Puntuen zerrenda

Nahi al duzu «zure bideaz» pentsatzen dudan guztia esatea? —Hara, bada: deiari erantzuten badiozu, Kristogatik gehien lan egiten duenak adina lan egingo duzula: eta otoitz arima bihurtzen bazara, lehen aipatu dizudan erantzuna eman eta lanik gogorrenak bilatuko dituzula zeure burua ukatzeko irrikaz…

Eta zoriontsu izango zara hemen, eta oraindik zoriontsuago gero, Bizitzan.

Zure esperientziak —garrazkeria hori, urduritasun hori, samintasun hori— Jesusen hitz haien egia sentiarazten dizu: inor ezin da bi nagusiren morroi izan!

Zaude isilik: ez ahaztu zure ideal hori argitxo piztu berria bezala dela. —Arnasaldi bat aski izan daiteke zure bihotzean itzaltzeko.

Entzuten duzu? —Beste bizibide, beste leku, beste maila eta beste lanbide batean on askoz handiagoa egingo zenuke. —Egiten duzuna egiteko, ez da adimen handirik behar!…

Ba nik hauxe esaten dizut: Jarri zaituzten lekuan poz ematen diozu Jaungoikoari…, eta infernutik datorkizun lilura baizik ez da, argi eta garbi, zu pentsatzen ari zinen beste hori.

Hori —zure ideala, zure deia— …erokeria da. —Eta besteak —zure adiskideak, zure anaiak— eroak…

Ez al duzu noizbait entzun oihu hori zure baitan? —Erantzun ezazu, irmoki, «eroetxe» horretan parte hartzearen ohorea Jaungoikoari eskertzen diozula.

Apostolu grina, zuri opa dizudan apostoluen erotasun jainkotiarra da, eta seinale hauek ditu: Maisuarekin harremanak izateko gosea, arimen aldeko ardura etengabea; ezerk hausten ez duen iraupena.

Poztu zaitez, beste batzuk apostolutza onetan lan egiten dutela ikusten baduzu. —Eta eska ezazu haientzat Jaungoikoaren grazia ugaria eta graziarekiko erantzuna.

Gero zu, zure bidera: ziur egon zaitez ez duzula besterik.

Bidetik aldendu zinen eta, lotsez, ez zinen itzultzen. —Bidezkoago zatekeen ez itzultzeak lotsaraztea.