Puntuen zerrenda

Karitateak eta gizalegeak eskatzen duten aitzakia atsegintsu eman ezazu. —Eta gero, bidean gora!, lotsagabetasun santuz, gelditu gabe eginbeharraren aldapa zeharo igo arte.

Zergatik mintzen zaituzte zuri buruzdabiltzan susmo erratu horiek? —Urrunago ere helduko zinateke, Jaungoikoak utziko bazintu. —Iraun ezazu onbidean eta ez izan ardurarik.

Baina, oraindik ere!, boteretsuen oniritzia, babesa eta atsegina behar ote dituzu Jaungoikoak nahi duena egiten jarraitzeko?

—Boteretsuak aldakorrak izaten dira eta zuk, berriz, iraunkorra izan behar duzu. Eskerronekoa izan zaitez laguntzen badizute. Eta arbuiatzen bazaituzte, segi arduratu gabe.

Zer axola zaizu mundu osoa eta bere botere guztiak zure aurka badauzkazu ere? Zu… aurrera!

—Salmoaren hitzak errepika itzazu: «Jauna dut argi eta salbamen: nork beldurtuko nau?… “Si consistant adversum me castra, non timebit cor meum”. —Etsaiez inguraturik ikusi arren, nire bihotza ez da ikaratuko».

Gauza handiren bat egiteko aukera datorrenean… orduan!, esaten didazu. —Orduan? Eguneroko prestaerarik gabe, entrenamendurik gabe, naturaz gaindiko Olinpiadan garaitu dezakezula sinestarazi nahi al didazu eta zuk ere benetan sinetsi nahi?

Bihozgabetzea zure iraupenaren etsaia da. —Bihozgabetzearen kontra borrokatzen ez baduzu, lehenengoz ezkortasunera eta gero epelkeriara iritsiko zara. —Baikor izan zaitez.

Irmo: hala izan behar duzu. —Besteen edo zerorren ahulaldiek zure iraupena zalantzan jartzen badute, zure idealaren irudi kaskar bat izango dut.

Behin betiko erabaki ezazu.

Zure bidearen iritzi urria duzu, hozten zarenean galdua duzula uste baduzu: frogaren garaia da; horregatik kendu dizkizute zentzuen pozgarriak.