Puntuen zerrenda

Hezitzaile: Zure ikasleek munduko zientzia lor dezaten, metodo onena bilatu eta erabiltzen jartzen duzun ahalegin ukaezina, jar ezazu kristau aszetika ezagutu eta erabiltzen ere, hori baita haiek eta zu hobeak izateko bide bakarra.

Akonfesionaltasuna. Neutraltasuna. —Beti eraberritu nahi izaten dituzten mito zaharrak.

Saiatu al zara pentsatzen, zein zentzugabeko gauza den katoliko izateari uztea, Unibertsitatean edo Lanbide Elkartean, Biltzar jakintsuan edo Parlamentuan sartzean, txapela atean uzten duenaren antzera?

Alferkerian egotea ulertezina da apostolu arima duen gizon batengan.

Ezar iezaiozu naturaz gaindiko arrazoi bat zure eguneroko zeregin profesionalari eta lana santutuko duzu.

Atsegin zait zure apostolu lema: «Atsedenik gabe lan egin».

Ez ditzagun nahas karguaren eskubideak eta norberarenak. —Lehenengoei ezin zaie uko egin.

Zu harritzen zaituenari nik bidezkoa deritzot. —Jaungoikoak zure lanbidean bilatu zaituela?

Horrela bilatu zituen lehenengoak: Pedro, Andres, Joan eta Santiago, sare artean: Mateo, zerga biltzaileen aulkian…

Eta, harritu zaitez!, Paulo, kristauen hazia zapaldu nahian.

Nolako grina dagoen munduan bakoitza bere lekutik irtetzeko! —Zer gertatuko litzateke, giza gorputzeko hezur edo gihar bakoitzak ez dagokion lekua hartu nahi balu?

Ez da bestelakoa munduko ondoezaren arrazoia. —Iraun ezazu zure lekuan, seme: zenbat egin dezakezun hortik Gure Jaunaren egiazko erregetzaren alde!