Puntuen zerrenda

Lehen, giza jakituria —zientzia— oso mugatua zenez, bazirudien gizon jakintsu bakar batek egin zezakeela gure Sinesmen Santuaren defentsa eta apologia.

Gaur egun, zientzia modernoaren hedapena eta sakontasuna dela eta, apologistek elkarren artean lana banatu behar dute Eliza alor guztietan zientifikoki defendatzearren.

—Zuk… ezin duzu eginbehar hori alde batera utzi.

«Et unam, sanctam, catholicam et apostolicam Ecclesiam!…» —Ulertzen zaitut, astiro-astiro otoitz egiten duzunean, ahogozatuz: Elizan sinesten dut, Bakar, Santu, Katoliko, Apostolikoan…

Bai poza nirea, bihotz-bihotzez esan ahal izatea: maite dut nire Ama Eliza Santua!

Oihu hau —«serviam!»— Jaungoikoaren Eliza zintzo-zintzo «zerbitzatzeko» borondatea da, baita ondasuna, ohorea eta bizitza kostata ere.

Elizaren Liturgia Santua eta elizkizun bereziak gurtu eta errespeta itzazu. —Zintzo bete itzazu. —Ez al duzu ikusten gizaki gaixook gauzarik handienak eta nobleenak ere zentzuen bidez gureganatu behar izaten ditugula?

Etsaiaren bozgorailu izatea egundoko ergelkeria da; eta etsaia Jaungoikoaren etsaia bada, bekatu handia. —Horregatik, lanaren alorrean, inoiz ez dut Eliza erasotzeko erabiltzen duenaren zientziarik goraipatuko.