Puntuen zerrenda

Nahi al duzu «zure bideaz» pentsatzen dudan guztia esatea? —Hara, bada: deiari erantzuten badiozu, Kristogatik gehien lan egiten duenak adina lan egingo duzula: eta otoitz arima bihurtzen bazara, lehen aipatu dizudan erantzuna eman eta lanik gogorrenak bilatuko dituzula zeure burua ukatzeko irrikaz…

Eta zoriontsu izango zara hemen, eta oraindik zoriontsuago gero, Bizitzan.

«Quia hic homo coepit aedificare et non potuit consummare!» —eraikitzen hasi eta ezin izan zuen amaitu!

Zuk ez baduzu nahi, inoiz ez dira esango zutaz hitz penagarri horiek; zure santutasunaren eraikina burutzeko baliabide guztiak zure esku baitituzu: Jaungoikoaren grazia eta zure nahimena.

Ez dut mirarien beharrik: Eskrituran azaltzen direnekin nahikoa dut. —Beharrezkoa dut, ordea, zuk zure eginbeharra bete eta graziari erantzutea.

Buruzagiak!… Sendotu ezazu zure nahimena, Jaungoikoak buruzagi egin zaitzan. Ez al duzu ikusten nola jokatzen duten elkarte sekretu madarikatuek? Inoiz ez dute jendetza bereganatu. —Beren kobazuloetan giza deabru batzuk prestatzen dituzte, asko mugituz jendetza nahastu eta zorabiatzen dutenak, beren atzetik joanaraziz neurrigabekeria guztien amildegira… eta infernura. —Hazi madarikatu bat daramate horiek.

Zuk nahi izanez gero…, Jaungoikoaren Hitza eramango duzu, mila eta mila aldiz bedeinkatua eta huts egin ezin duena. Eskuzabal bazara… eta erantzuten baduzu, zure santutasunaren bidez besteena ere lortuko duzu: Kristoren erregetza: «omnes cum Petro ad Jesum per Mariam».

Bidea argi ikusten baduzu, jarrai iezaiozu. —Nola ez duzu baztertzen geldiarazten zaituen koldarkeria?

Esaiozu: «ecce ego quia vocasti me!» —hemen nauzu, dei egin didazulako!