Puntuen zerrenda

«Gizakia ez da ogiz bakarrik bizi, baizik eta Jaungoikoaren ahotik irtetzen den hitz orotik», esan zuen Jaunak. —Ogia eta hitza!: Ostia eta otoitza.

Bestela, ez duzu grazi bizitzarik biziko.

Sar zaitez Kristo Gurutziltzatuaren zaurietan. —Han ikasiko duzu zure zentzuak gordetzen, barne-bizitza izango duzu, eta etengabe eskainiko dizkiozu Aitari Jaunaren eta Mariaren oinazeak, zure zorren eta gizakien zor guztien ordainez.

«Sine me nihil potestis facere!» Argi berria, hobeto esateko, Betiko Argia den Ebanjelio Santuaren argitasun berriak nire begientzat.

—Harritu al nazakete «nire»… tontakeriak?

—Sar dezadan Jesus nire gauza guztietan. Eta, orduan, ez da tontakeriarik izango nire jokaeran: eta, egokiago hitz egitearren, aurrerantzean ez dut nire gauzak esango, «gure gauzak» baizik.

Jesus zure adiskide da. —Adiskidea. —Haragizko bihotza duena, zurea bezalakoa. —Haren begiak, ezin maitagarriagoak, Lazarorengatik negar egin zuten…

—Eta Lazaro adina maite zaitu zu ere.

Zure eraikin espirituala kulunkatzen bada, dena airean dagoela iruditzen bazaizu…, Jesus eta Mariarenganako konfiantzan oinarritu zaitez, harri tinko eta ziur horren gainean eraiki behar izan baitzenuen hasieratik.

Gauzak ondo, oso ondo egin nahidituzunean, okerrago egiten dituzu.—Behera zaitez Jesusen aurrean, esanaz: ikusten al duzu dena gaizki egiten dudala? —Ba, ez badidazu asko laguntzen, are eta okerrago egingo dut!

Erruki zaitez zure haurraz: begira, egunero orrialde handi bat idatzi nahi dut nire bizitzako liburuan… Baina, hain baldarra naiz! Maisuak ez badit eskua eramaten, marra lirainen ordez, inori erakutsi ezin zaizkion astamakil bihurri eta zirriborroak irtetzen dira nire lumatik.

Hemendik aurrera, Jesus, bion artean idatziko dugu beti.